Dünya maliyyə böhranı Azərbaycanda mədəniyyət üçün ayrılan büdcəyə də təsir edəcək ( 19 Feb 2009 saat 11:25:51 )
Dünya maliyyə böhranının 2009-cu ildə həyata keçirilməsi planlaşdıran iri mədəniyyət layihələrinə də təsir ehtimal olunur. Qeyd edək ki, bu il mədəniyyət sahəsində Dövlət Xalça Muzeyi üçün binanın tikilməsi, açıq səma altında Etnoqrafiya muzeyinin yaradılması, C. Cabbarlı adına “Azərbaycanfilm” kinostudiyasının təmir-bərpası, dövlət sifarişi əsasında yeddi bədii filmin istehsalata buraxılması, M. F. Axundov adına Milli Kitabxanada əsaslı təmir işlərinə başlanılması, İslam mədəniyyəti paytaxtı elan olunan Bakıda geniş tədbirlərin keçirilməsi, "Avrovijn" rəqs müsabiqəsinə hazırlıqların görülməsi kimi çoxsaylı iri və kompleks tədbirlərin keçirilməsi nəzərdə tutulub. Neftin qiymətinin ucuzlaşması səbəbindən büdcə gəlirlərinin azalacağını nəzərə alan iqtisadçı ekspertlər isə böhranın dərinləşəcəyi cari ildə iri layihələrdən daha çox dövlətin iqtisadi və siyasi maraqlarını əks etdirənlərinin önə çəkilməsini vacib bilir. “Qarabağ probleminin dünyaya tanıdılması və onun həll olunması istiqamətində hansısa irəliləyişlərə nail olmağımız, Azərbaycan mədəniyyətinin dünyaya tanıdılması və bir mədəni ölkə olaraq tanınması ön plana çəkilir. Bütövlükdə mədəniyyət layihələrinə çəkilən xərclər bunların əsasında qiymətləndirlir. Böhran dövrü olduğu üçün layihələrə xüsusi yanaşma irəli gəlir. Məhz o cür böyük problemlərin həllinə yönələn layihələr çox önəmlidir” - deyə iqtisadçı ekspert Azər Mehdiyev bildirib. Əvvəllər planlaşdırılan layihələrin əsasən artmaqda olan neft gəlirlərinə söykəndiyini xatırladan ekspert dünya ölkələrini vahiməyə salan iqtisadi böhran şəraitində, neftin qiymətinin günü-gündən enməsi fonunda böyük maliyyə vəsaiti tələb edən iri layihələr arasında seçim etməyin zəruri olduğunu qeyd edir. Azər Mehdiyevin fikrincə, dövlət effektlilik baxımından daha az səmərə verəcək layihələrdən imtina etsə yaxşı olar. “2009-cu il kimi böhran ilində böyük xərclərlə maliyyələşdirilməsi, söhbət yalnız beynəlxalq tədbirlərdən getmir, yolverilməzdir. Elə ölkə daxilində, Bakıda dünyada analoqu olmayan fəvvarələrin tikintisi kimi, park və bağların təmiri işlərindən tutmuş son nəticəsi elə də böyük nəticələr vəd etməyən idman və mədəniyyət tədbirlərinə qədər. Vəsaitlərin daha çox əhalinin sosial vəziyyətinin yüngülləşdirilməsinə istiqamətlənmiş sahələrə, yaxud iqtisadiyyata təkan verməklə yeni iş yerlərinin açılmasına imkan verən sahələrə yönəltməsi daha məqsədəuyğun olardı”. Mədəniyyət və Turizm Nazirliyindən isə qlobal maliyyə böhranının bu il üçün nəzərdə tutulan və artıq icrasına başlanılan layihələrin işinə böyük təsir etməyəcəyi bildirilir. Nazir Əbülfəs Qarayev tədbirlərin planlı şəkildə həyata keçiriləcəyini deyir. “Artıq Nazirlər Kabineti tərfindən investisiyaların siyahısı təsdiq olundu. Bizə müəyyən vəsait ayrıldı. O vəsait çərçivəsində biz işlərimizi davam etdirəcəyik. Biz bu il gənc tamaşaçılar teatrını tamamlamaq niyyətindəyik. İncəsənət Muzeyinin 1-ci hissəsini tamamlamaq niyyətindəyik. Xalça Muzeyinin tikintisi davam etdirik həmçinin iki yeni böyük layihə başlandı. "Nizami" kinoteatrı artıq bərpa işlərinə tam həcmdə başlayıblar və milli dram teatrının binası yenidən qurulur". Maddi çətinliklərin qarşıya çıxmayacağını proqnozlaşdıran Əbülfəs Qarayevin fikrincə, maliyyə böhranı yalnız gələcəkdə başlanılması planlaşdırılan işlərin icrasında müəyyən ləngiməyə səbəb ola bilər. Həyata keçirilməsi vacib layihələr isə nəzərdə tutulan vaxt içərisində gerçəkləşdiriləcək.
ƏLAQƏ (YAYIN KURULU)
